Kerensa

1Mar lavarren yn tavosow a dus hag a eledh, ha my heb kerensa, brest ughel y son po symbal ow tynkyal y fien. 2Ha mar pe dhymm galloes dhe brofoesa, ha mar konvetthen pub kevrin ha pub oll godhvos, ha mar pe dhymm fydh gowal may hallen tenna dhe-ves menydhyow, ha my heb kerensa, ny vien travyth. 3Ha mar rannen ow fythow oll, ha mar rollen ow horf dh'y leski, ha my heb kerensa, ny via kammenn dhe'm les.

4Pell ow perthi yma kerensa; kuv yw kerensa, ny berth avi; kerensa ny vost, nyns yw goethus, 5ny omdheg heb onester, ny hwila hy les hy honan, nyns yw es hy serri, ny wra vri a dhrokoleth, 6ny's teves heudhder yn kammwrians, mes heudhhes yw y'n gwiryonedh. 7Hi a berth pup-tra, a grys pup-tra, a wayt pup-tra, a wodhev pup-tra.

8Kerensa ny fyll nevra; mes mars eus profoesansow, i a wra gorfenna; po tavosow, i a wra difygya; po godhvos, ev a wra gorfenna. 9Rag yn rann ni a woer hag yn rann ni a brofoes; 10mes pan dheu an pyth yw perfydh, gorfenna a wra an pyth usi yn rann. 11Pan en vy flogh, my a leveri avel flogh, my a dybi avel flogh, my a resna avel flogh; pan dheuth ha bos gour, my a worras dhe-ves traow a flogholeth. 12Rag lemmyn, ni a wel yn gweder, yn tewl, mes ena fas orth fas; lemmyn my a woer yn rann, mes ena my a wra aswonn yn tien, kepar dell ov vy aswonnys yn tien. 13Ytho, lemmyn y pes fydh, govenek ha kerensa, aga thri; mes an brassa a'n re ma yw kerensa.